Оила хуржун      Бош саҳифа

«Кимни ёзай, дадаси?»

Фарҳод МУСАЖОН

Хона. Безатилган дастурхон атрофида эр, хотин ва 12-13 ёшлар чамасидаги бола нонушта қилиб ўтиришибди. Кайфиятлари чоғ.

«Кимни ёзай, дадаси?»

Эр: Йўқ, йўқ, тойчоқ, сиз синфи­нгиздаги ўртоқларингизни ё бир кун олдин, ё бир кун кейин чақирасиз. Туғилган кунингизда сира ҳам тўғри. Хўпми, тойчоқ?

Бола: Қанақа одамлар?

Эр: Катта одамлар, казо-казолар, аслзодалар келади.

Бола: У нима деганингиз?

Эр: Яъни... сизга нима десам экан, яъни яхши одамлар келишади. Энди, тойчоқ, сиз дарсингизни қилинг! Бизнинг ойингиз билан ишимиз бор.

Бола: Хўп (Четроққа бориб ўтиради).

Эр: Қани, Қутби, қоғоз-қалам олиб бундай ўтир, чақирадиган одамларимизнинг бир рўйхатини тузиб олайлик.

Хотин: Ҳозир, ҳозир (Хотин жавондан қоғоз-қалам олиб эрига келтиради).

Эр: Йўқ, йўқ, ўзинг ёз, хатинг чиройли. Менинг хатимни ўқийдиган ҳали онасидан туғилмаган. Энди ишга ўтайлик. Ёз! Биринчи навбатда, рўйхатнинг бош-қоши, уйимизнинг тўри шак-шубҳасиз...

Хотин: Боситхон акангиз!

Эр: Ичимсан-да хотин, ичимсан. Боситхон акамлар рафиқалари билан!

Хотин: Ҳой, дадаси, бир галчалик шу Боситхон акангизни таклиф қилмасак қандай бўларкан? Ахир, қачон бирорта чақириқ қилмайлик, бош-қошида Боситхон акангиз келади. Бир галчалик...

Эр: Ўв! Боситхон акамларнинг нега сенга оғирлиги тушиб қолди?

Хотин: Менга эмас сизларга оғирлиги тушади. Ҳамма хушомад ўша кишига. Ҳаммаларинг атрофида гиргиттон бўласизлар. Худди мусобақа ўйнаётгандай оғизларини пойлаб ўтирасизлар.

Эр: Қанақа мусобақа?

Хотин: Оғизларидан чиққан гапни ким биринчи маъқуллар экан, деган мусобақа-да!

Эр: (бироз анқайиб қолади) Ҳо... тилинг қурсин заҳар бўлмай! Ҳали мен сенга лаганбардор бўлиб қолдимми?.. Еб-ичишинг, бойлигинг, қўша-қўша гиламлар ўша кишининг орқаларидан бўлса...

Хотин: Бўпти, жаҳлингиз чиқмасин. Чақирсангиз-чақираверинг. Мен сизларни ўйлагандим, бир яйраб, девдим. «Подхалим»лик қилавериб жуда эзилиб, қийналиб кетишлари­нгизни ўйлагандим-да.

Эр: Менга қара, нодон одам, ўзим ҳам уни биламан, ўтакетган димоғдор, кибрли, такаббур одам. Аммо начора, чақирмасдан илож йўқ. Чақириқ қилиб уни айтмаганимни эшитиб қолса, нақ оёғимни осмондан қилиб юборади…

Хотин: Майли, ёздим, мана!

Эр: Иккиламчи. Мирсадриддин ака кеннойимлар билан.

Хотин: Э, қўйсангизчи, ўша маҳмадонангизни.

Эр: Ўв, нодон, ўв, содда, калтафаҳм! Ёз дегандан кейин ёзаверсанг-чи! У Боситхон акамнинг ўнг қўлидек гап, бошқармада унинг олдига тушадиган лаганбардор, ундан ўтадиган хушомадгўй йўқ, қолаверса, бирорта ўтириш усиз ўтмайди. Лекин кеннойимлар, ҳақиқатдан менга ёқмайдилар. У киши меҳмонга эмас, худди бозорга боргандек ўзларини кўз-кўз қиладилар.

Хотин: Ўзларини эмас, бойликларини денг. Тиллоларини, зарларини бозорга солиб кўз-кўз қилгани келадилар.

Эр: Хўшш… Энди навбат Абдураҳмонбегига. Менга қолса, мана шу совуқни ёзмасдим.

Хотин: Вой, ҳаммани айтиб буни ажратиб қўясизми, эшитса, нима деган одам бўласиз?

Эр: Ҳа, эшитса, ҳафа бўлади. Аммо ёмон бетаъсир одам-да! Бунақа мечкай, бунақа суқ, бунақа очофатни умрим бино бўлиб кўрмаганман. Ҳа, ахир, меҳмонга келганингдан кейин ҳамма қатори обрўйингни сақлаб ўтир. Йўқ, «уни опкел, буни опкел», деб дўқ қилади. Ароқни-ку, сувдек ичади.

Хотин: Ўзини ўзи десангиз, хотини ўзидан ҳам бачкана.  Қачон қараса ишшайгани ишшайган.  Тавба...

Эр: Хотини дуруст, очиққина. Хотин кишининг очилиб-сочилиб ўтиргани маъқул-да, кеккайиб ўтиргандан.

Хотин: Ҳо, ёқмай ўлсин! Бировнинг хотини қанча очилиб-сочилиб ўтирса-да, шундайми?

Эр: Эй, гапни чалғитмасдан ёзсанг-чи! Хўш, кимга навбат келди. Ҳа, Хайруллахўжа қолиб кетай дебди-ку!

Хотин: Хўжани ҳам айтасизми? Сал анақароқ, деб юрасиз-ку уни.

Эр: Лекин ўзига еткунча шум, ўзига етгунча шайтон, хўжаси тушмагур.

Хотин: Келинг, қатордан қолмасин, ёзиб қўя қолай.

Эр: Майли, ёз! Хўш, энди анави бор-у, уни ҳам ёзамизми?

Хотин:  Ким экан у?

Эр: Ҳа, анави лалайган бор-у, Эшвой, Эшвой.

Хотин: Уни нима қиласиз, ҳар хил қаланғи-қасанғиларни айтаверасизми?

Эр: Энди хизмат-пизмат қилиб юрармиди, дейман-да! Чой ташиш, овқат-повқатга қарашиш дегандек.

Хотин: Овқатни ўшасиз ҳам эплармиз. Тенгингизмас-да, дадаси, тенгингиз эмас!

Эр: Бўпти, ўчир ялангоёқни! Яна ким қолди...

Бола: Ада!

Эр: Нима дейсиз, тойчоқ?

Бола: Ундан кўра синфимиздаги ўртоқларимни айтиб қўя қолайлик.

Эр: Нега энди, уларни бошқа куни айтамиз дедим-ку!

Бола: Ўзингиз, яхши одамларни чақираман деб, мени алдабсиз, ҳаммаси ёмон одамлар экан-ку?!

Эр: Ие, нима деганинг бу, бетамиз?!

Бола: Ахир, боядан бери ойим билан ўтириб ҳамма келадиган меҳмонларни ёмонлаяпсизлар-ку!

Эр: (анграйиб қолади, кейин дўқ уради) Катталарнинг ишига аралашгандан кўра, ўтириб дарсингни тайёрла, ўв, беадаб!..

 

Жавлон ЖОВЛИЕВ

тайёрлади.




Ўхшаш мақолалар

ПЛАСТИК  ОПЕРАЦИЯ

ПЛАСТИК ОПЕРАЦИЯ

🕔15:05, 17.09.2018 ✔56

  (ҳажвия)

Лўғимбек қишлоғидаги истироҳат боғида ижодий кечамиз белгиланган.

Батафсил
Отангга  раҳмат!..

Отангга  раҳмат!..

🕔11:22, 16.08.2018 ✔119

Нортўхта тоға тушга яқин Ғиждувон бозорида айланиб юрганди, телефони биғиллади. Олса, кампири: «Бир кило гўшт ола қайтинг, кўнглим баракни тусаяпти...»

Батафсил
Танқид  жамғармаси

Танқид жамғармаси

🕔11:58, 02.08.2018 ✔119

Г.КЕМОКЛИДЗЕ,

Россия

Яқинда Иван Петрович мени ҳузурига чорлаб, тилёғламалик билан шундай деди:

Батафсил
Ҳаммасино кўриш

Сонларни танлаш

Пайшанба, 29-Декабр  
52 51 50 49 48 47 46
45 44 43 42 41 40 39
38 37 36 35 34 33 32
31 30 29 28 27 26 25
24 23 22 21 20 19 18
17 16

Ҳаммасини кўриш 

Кўп ўқилганлар

  • ПЛАСТИК  ОПЕРАЦИЯ

    ПЛАСТИК ОПЕРАЦИЯ

      (ҳажвия)

    Лўғимбек қишлоғидаги истироҳат боғида ижодий кечамиз белгиланган.

    ✔ 56    🕔 15:05, 17.09.2018
  • Отангга  раҳмат!..

    Отангга  раҳмат!..

    Нортўхта тоға тушга яқин Ғиждувон бозорида айланиб юрганди, телефони биғиллади. Олса, кампири: «Бир кило гўшт ола қайтинг, кўнглим баракни тусаяпти...»

    ✔ 119    🕔 11:22, 16.08.2018
  • Танқид  жамғармаси

    Танқид жамғармаси

    Г.КЕМОКЛИДЗЕ,

    Россия

    Яқинда Иван Петрович мени ҳузурига чорлаб, тилёғламалик билан шундай деди:

    ✔ 119    🕔 11:58, 02.08.2018
  • Кар ва йўловчи

    Кар ва йўловчи

    Бир киши пахта териб юрган экан.  Узоқдан нотаниш йўловчи келаётганини кўрибдию унинг берадиган саволларини тахмин қилиб ўзича жавоб тайёрлаб қўйибди.

    ✔ 124    🕔 11:57, 02.08.2018
  • Қоч, асабий машина келяпти!

    Қоч, асабий машина келяпти!

    Ҳайдовчиларни танқид қилиш осон-да. Маданиятсиз, ҳовлиқма, бефаросат... Эҳтимол, шундайлари ҳам бордир. Лекин уларга ҳам осонмаслигини унутманг-да. Яхшиси, келинг, сизни бир хаёлий саёҳатга таклиф этаман. Уловга яхшилаб жойлашинг, хавфсизлик камарини тақинг, кетдик!

    ✔ 133    🕔 10:52, 19.07.2018
Ҳаммасини кўриш 

Фойдали манбаалар