Масаллиқлар: ёғ, 200 гр. лаҳм гўшт, бир дона пиёз, 2 дона сабзи, 3-4 дона картошка ва икки дона жўхори. Таъбга кўра, туз, зираворлар ва кўкатлар.
 

Тайёрланиши: аввал жўхори сўтасидан ситиб олинади. Сўнг блендерда ёки ҳовончада туйиб майдаланади. Гўшт, сабзи, картошка майда тўртбурчак шаклда тўғралади. Пиёз паррак қилиб тўғралади.
Қозонга бир чўмич ёғ солиб, қизигандан сўнг аввал гўшт қовурилади (қотиб қолмаслиги керак). Сўнг пиёз, картошка навбати билан солиниб, бироз қизаргунча қовурилади. Сув солиб, тузи ростланади ва сабзи ҳам солинади. Ўн дақиқа атрофида ўрта оловда қайнатилади. Майдаланган жўхори солиб, 20 дақиқа атрофида милтиллатиб қайнатилади. Тайёр шўрва косаларга сузилиб, устига кўкатлар солиш мумкин.
Ёқимли иштаҳа!